【曾智華專欄】捧莫雷拉變返莫雷拉

莫雷拉，對全港馬迷及馬評人來說，根本是一個謎，一個大家都好想拆開，重重疑團的謎。
　　
千祈咪賴人陰謀論，又指亂噏亂咁估，只因「莫雷拉事件」全無透明度。我幾次兜口兜面問馬會不同高層，個個眼神若有隱藏，不便言明咁款。咁情況，你要人唔「亂」猜度，咁仲有言論自由嘅？
　　
呢呢，今次又神奇嘞。根據「雷神」（近日佢的演出，的確變返神級）老友黃興桂透露，佢會略帶「神秘」地今晚才抵港，立即由馬會專車「護送」去酒店休息，然後明天出現馬場，嘭嘭聲跑完，又再火速由馬會專車（車上有冇保鏢？）「護送」到機場，即晚要走。
　　
咁嘅安排，你咪話我疑心大嘞，小弟乃「資深傳媒人」，我哋嘅專業訓練，以及師傅早早教落：「千祈唔好人哋講你就信，尤其官方言論，必須查根究柢，要有證有據！」所以，我絕對唔接受莫雷拉用好忙做藉口，就此仆到咁嚟、仆到咁走！
　　
尤其佢又話自己有傷在身，咁為乜唔悠悠閒來，先唞幾日，跑完再悠悠閒Hea幾日，先返巴西？既然已經名利無憂，巴西又有大農場，更冇一個地方馬場可以綁住佢，火燭車咁來去，同佢聲稱的身體狀況唔多脗合喎。
　　
究竟馬會為乜如此安排呢？小弟懷疑有個「大勢力」，唔想/畀佢接觸其他人，尤其傳媒！以免你班友仔問吓問吓，問出尷尬「真相」！
　　
講返馬。既然莫雷拉變返「雷神」，以佢的神級騎功，根本冇人夠佢揮。
　　
所以，明日投注策略，我全部買雷神過關，然後攞住放大鏡睇（欣賞？）佢每場演出，如何表演「藝術性」騎法。
　
一個如此有天分騎師，背負著一個無法解開而人人「誤會」的謎，可惜呀！