【黃庭桄專欄】宜專不宜濫

跟同事閒聊，分享如何培育子女，發現她們總愛排山倒海地安排課外活動，星期一上珠心算，星期二學游水，星期三吹長笛，星期四學鋼琴，星期五操乒乓波。
　　
到了星期六和日的假期，點會放過小朋友吖！一於繪畫班、英語會話班、話劇班、童軍、國際象棋班輪住上，彷彿一旦令到小朋友有空閒時間，就是罪過。
　　
其實，小朋友仲有冇休息的時間？本來是無憂的快樂童年，變成一隻攰到死的填鴨。天真的笑聲，還能聽到嗎？
　　
當然明白父母望子成龍的心態，如果經濟能力許可的話，自然會盡心盡力，提供最好的教育，找最頂班的導師，務求栽培子女多才多藝，張張刀都咁利。
　　
亂石投林，到頭來資源錯配，每樣才藝都是蜻蜓點水，又怎能成為精英分子呢？
　　
想像一下，一星期只花一天裏的一小時，去學習打乒乓波，即使教練是奧運代表隊又如何？但如果一星期有五天時間都主力去苦練球技，死操爛操，成績肯定會突飛猛進。
　　
為人父母，不要太貪心，你只需要培養子女有一項興趣或技能，就去強攻吧！不用多心去乜都學，有一樣專長，便夠贏。
　　
小朋友愛繪畫嗎？就重點培育，讓他學水墨國畫，也學西洋油畫，多睇畫展，令他專注於畫藝，時日將能見證成就。
　　
奧運金牌選手，都不會既贏馬拉松，又是百米短跑冠軍，再贏推鉛球，然後玩埋游水做蛙后啦！
　
擁有一面有分量的金牌，勝過報名參加十個項目，卻都是徒勞無功。