【曾智華專欄】突然「老友」湧現

昨日講到馬時亨新節目今晚在TVB登場，望傳媒老友大力「唱開去」，望收視率開紅盤！
　　
傳媒老是佛聚餐，Fit馬當然知道必須有貨交，故率先爆出第一集嘉賓張學友「堅拒一億人仔邀請」，以及「舞台王者出場前腳震」兩單獨家料。
　　
另外，佢又笑笑口，搖頭扮好苦：「慘啊，呢輪我突然間多咗好多『老友』！」
　　
公開講慣嘢之人，當然知道「伏線」（Punch Line）的重要性。首先拋條線出嚟吊你胃口，然後再開估。
　　
多「老友」竟要呻好慘？佢搞邊科？
　　
原來馬時亨今天的要職，為富衛保險集團主席。若大家有留意此集團，當知近兩年幾鬼高調！相信正在營造雷霆萬鈞聲勢部署上市。

以大老闆李澤楷的作風，一係唔郁手，一郁就要贏對手幾個馬位。
　　
近兩年富衛用盡Mirror之外，更非常重手贊助各式各樣高卡士活動，當中即將殺到為：
　　
一、《富衛保險冠軍賽馬日》（各地馬王亮相香港）。
　　
二、《張學友60+巡迴演唱會》。
　　
前者有Anson Lo及陳慧琳擔任大使，現身馬場。後者呢，因學友已幾年冇開演唱會，早令歌迷餓到變飢荒！
　　
兩個活動皆富衛贊助，吸引力勁度沖天飛。馬主席在香港交遊廣闊，真的「老友」已成千上萬。當然，點頭之交為表自己「有面」，亦希望拉衫尾獲邀四月三十日入場（一定要帶埋老婆）及搶到學友演唱會門券，於是幾大認做Fit馬「老友」，由此而人數突然激增，乃正常現象！
　　
小弟周三貼士符碌全中，1W3Q，感謝馬神！
　　
明天研究四班一千米。潘頓騎黎廄「花好月盈」必熱。
　　
我則1W3P捧老友林健榮隻「營造創科」！馬主大旺，剛冧莊再任香港建造商會會長，賀下佢先！