【黃庭桄專欄】不捨得食

到日本旅行，我最愛買草餅回來慢慢吃，愈是好味道的東西，愈不捨得吃，總是會留在一個自以為特別的日子，例如在放大假的第一天，坐在午後的窗前，斟一杯香檳，播一首蔡琴的老歌，慢慢拆開和風包裝紙，輕咬一口草餅，享受無閒事掛心頭的時光。
　　
然而當清空行李時，隨手把草餅擱在一旁，有一種「暫時唔食住」的想法，便已注定，我和草餅的距離，拉得遠如天涯與海角，因為那盒草餅往往擺到過晒期也不為意，食都未食過，便要扔掉，嘥晒！
　　
有些東西買回家，是為了買一個期待，或想留住快樂的印記，總有一點點情味。
　　
當年我的媽媽離開人間後，執拾她的遺物，發現她原來買了不少套裝，始終不捨得拿出來穿著，估計是等待喜慶日子才裝扮吧，可惜一等，便是一輩子。
　　
「等你大學畢業，或者結婚大日子，我先會拎來著。」媽媽的心思，終究成泡影。一套套新衣，多年來，就此無聲地藏在衣櫃深處。
　　
我有一個世伯，辛勞了大半生，到了六十歲便正式退休，打算好好享受人生，周遊列國，玩返夠本。
　　
誰知道他退休了短短半年，便發現患上末期肝癌，甚麼地方都去不成，終日在電療和化療中度過。
　　
「後生時，原本諗住畀心機搵多啲錢，等老咗可以慢慢歎世界，所以乜都唔捨得食、唔捨得玩，到頭來錢係賺到，但捱壞咗身子，結果乜都享受唔到，咁就一世，唔甘心！」
　　
人生，就當是最後的瞬間而活吧！