【曾智華專欄】貼馬有咁準已好正

若小弟投注賽馬有咁準，應該已經發咗達！講乜？正是講上周本欄預測《第41屆香港電影金像獎》勝出名單，一共十三項，結果中咗七項，剛剛過半！
　　
重溫一次，中咗：一、最佳電影；二、最佳女主角；三、最佳女配角；四、最佳剪接；五、最佳新導演；六、最佳美術指導；七、最佳服裝造型設計。
　　
其他唔中的，個別有啲唔服，不過又唔係由我選，大致講，多年來由專業電影工作者選出的，基本頗得人心。
　　
今屆狂大爭議的，當然是最佳電影由《給19歲的我》奪得。結果公布後，社交媒體爆出「雷動反應」。N咁多人問小弟點睇？也有記者要求訪問。睇嚟係因反對聲音唔細，故想搵人解釋一下點解圈內人推舉此片啩。
　　
其實記者要追訪的，應是有票在手的評審，而非小弟呢類憑直覺判斷的塘邊鶴。
　　
個人觀察，《給19歲的我》事件已發展到非常情緒化。看看網上如洪流的批評及攻擊，部分雖仍希望以理服人，但更多的是詛咒、謾罵、粗言穢語。整個氛圍，完全不利客觀討論/辯論。
　　
事實，我在自己的社交平台，也Block咗幾個情緒失控、連串粗口爛舌者，希望佢哋改去「同道組」，大家價值觀及文化太大差異了。
　　
說來，電影金像獎只一年一次，早已公布舉行日子。故此候選者為尊重自己，尊重大會，尊重整個電影業，理應全部出席。但結果個別明知多數輸，唔想「做啦啦隊」者，紛紛用「度唔到期」做藉口缺席，實在太小器。喂，係咪若你贏，人哋陪坐抬橋就得，倒轉你抬下轎就死唔肯蝕底？
　　
邊個如此？我唔會寫出來，其實大家當晚有睇直播的，當然一清二楚！