【曾智華專欄】有得震冇得瞓

上周三潘頓夢遊馬場一晚後，上周六立即紮醒，一郁手就𡁻三W六Q一P，真係任佢開！

點解咁勁？ 無他， 騎功超一班，好馬任佢揀，有乜法子唔好似蟹咁——打橫行？

本來馬場乃英雄地，冇人想輸者。但去到老潘境界，真係可以輸贏隨意，反正想做「英雄」隨時得，你估似黃俊及黎海榮咩。　

馬季步入尾段，開始有五位練馬師有得震、冇得瞓，因分分鐘收警告信。包括鄭俊偉、何良、高伯新、徐雨石及苗禮德。鄭及何最腳震，因兩位已連續兩季收信，若今季再收，有可能釘牌冇得玩。

馬會呢個制度非常好，因任何行業要進步，必須汰弱留強，能者居之，不可婆婆媽媽。今季最難明為徐雨石，太過唔合邏輯地失常。上季仍有二十一W，雖只得十七W有效而被警告，但起碼接近安全線。今季真係唔知搞邊科，雖因成績差有馬流失，但旗下仍有三十八匹馬（三十六匹可以出賽），點解慘到只得五W？好難交代啫。

另外，更離奇是苗禮德，大家可記得佢幾巴閉？到港前兩度成為南非冠軍練馬師。抵港一開倉，即憑「勝利名駒」贏打吡大賽，聲名震天響。之後又訓練出馬王「雄心威龍」。點解今季好似食錯藥，搞到身水身汗仍只得四W？邊個有答案？

至於來自法國的名牌練馬師高伯新，也曾是「贏大賽如食生菜」的殿堂級人馬。慘情，至今仍只得八W，若果冇短途馬王「福逸」頂住，分分鐘更大鑊。

究竟高、徐、苗三廄發生乜事呢？我真係好想知答案！

今晚又有得玩！我會用呂健威彈畀契仔何澤堯的「勇敢巨星」、「百勝名駒」及「高明駿將」W三串七，再P三串四！