【曾智華專欄】殺到「食滯」中途離場

曾經公開講過，入戲院欣賞電影，我會很濫，基本上乜都睇。不過，一旦發覺並非自己杯茶，又或誤中渣片，就會立即起身走人。
　　
多年來已試過N次中途離場，原因如上述，但絕少似今次——食滯離場！食滯乜？殺人的場面！
　　
大家必定知小弟講邊套，對！正是《殺神John Wick 4》。這個系列拍咗九年，去到第四套。之前三套，我套套有睇，也套套毫不例外，中途離場，並非殺到滯，而是呢類片開場已知結局！大「橋」人人識寫，只差在細節不同。故此睇到咁上下，夠嘞，即走。
　　
走，並不代表對電影不滿，反之，套套《殺神》皆覺超值，尤其《4》，簡直大大大大超值，抵到無話可說，再畀多一倍錢都應該！
　　
此片有幾方面，絕對可以成為教材：一、殺人設計，幾百款，款款不同；二、攝影美學，個個畫面皆精心設計，全部美不勝收，肯定是集齊高手中的高手一同出招；三、動作設計。早年全球觀眾睇見李小龍或成龍的武打片，經已嚇到嘩嘩聲。四十年後今日，變小兒科矣。不過，荷里活若冇袁和平一類大師指導，也不能單靠「鬼佬」去到呢個水平。
　　
《殺神4》個個主角造型都好「型」，不論忠奸，一企出來就有型有款。咁多型人，你估小弟認為邊個最型？最難忘？
　　
我咁講，當然不會是奇洛李維斯啦。甄子丹？也不是！真田廣之？對，好型，但也不是。
　　
而是一位你估佢唔到，入場前根本唔知佢存在的英國演員史葛艾堅士，四十六歲，本身是武術家，為此片將自己谷肥起碼八十磅，變成大肥佬，但身手呢，請入場比較佢同洪金寶的犀利程度！
　　
睇完史葛與奇洛交手後，夠了，殺到滯，起身離場！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。