【曾智華專欄】中澳關係影響飲食

每天早上，小弟皆會詳細睇電視及閱讀報章國際新聞，尤其有興趣為大國的外交政策變化。必研究的是中美角力最新招數。若不Take Side上晒心、只講立場不講道理，會是非常具「娛樂性」及「策略性」。
　　
尤其近月，中國頻頻出招，又推俄烏和談，又推中東和平，拉攏沙地及伊朗建交。繼而邀請德國總理、法國總統及巴西總統排隊到北京。當然，唔少得安排國民黨前主席兼台灣前領導人馬英九到內地「祭祖」（目的心照）。
　　
若以捉棋看，真的是步步精心設計。另一邊美國看在眼內，相信亦會日日評估形勢而還招。暫時中美格局，鬥而不破，各自盤點籌碼。
　　
中國擺明逐個西方國家撬，其中之一是澳洲。要撬，不能單方面一廂情願，而是要先「眉來眼去」。澳洲自從總理阿爾巴尼斯上台後，已一改上任的企硬政策，願意開始與中方對話，雙方漸行漸近。
　　
中國外交部副部長馬朝旭上周到訪澳洲，就是一個明顯的正面訊號，一旦「有偈傾」，回國上報，北京就會發出正式邀請，讓多番表示對話持「開放態度」的阿爾巴尼斯，可以成行。
　　
外交部署，必須謹慎。要見，就一定表現老老友友，否則用時間再「營造條件」可也。
　　
中澳關係改善，我睇必成事實。除政治外，有乜影響？
　　
剛與一位紐西蘭葡萄酒商朋友見面，佢話：「碌Sir，你知嘛，過去幾年，中澳交惡，搞到我哋雞毛鴨血！因澳洲酒入唔到中國，一個轉身大量傾銷紐西蘭，搞到我哋市場冧晒咁滯，真係畀佢吹脹！假若澳洲能返中國市場，我哋真係舒服晒！」
　　
同一道理，香港人可能就快冇超平澳洲龍蝦歎喇！