【曾智華專欄】莫雷拉變返「莫雷拉」

周三冠軍騎師潘頓再表演「夢遊馬場」，騎八隻，死咗兩隻全熱，又瓜埋幾隻半熱，成功完成「伏匿匿」！其實馬會操盤手早已預告，因「騎師王」開飛四點二五倍，當然冇咁大隻蛤乸。咁點解仲有兩隻全熱？有大量馬迷一廂情願囉。
　　
講到騎師，近日與馬迷老友飯局主題，並非香港馬事，而是澳洲馬事。
　　
點解？因上周澳洲大賽，赫然發現香港前N屆冠軍騎師莫雷拉上陣。咦⋯⋯乜佢唔係話周身難以回轉傷勢，要掛靴嘅咩？更奇，直播中的莫雷拉，變返十年前的「莫雷拉」！即係點？即係完全恢復「藝術性騎功」，隻隻馬在佢胯下「享受賽事」，輕輕推送，已一隻又一隻前列而返。
　　
肉眼所見，丁點不見呢位恢復「雷神」狀態的騎師，有任何體能問題，更看不見離港前幾年笑唔出、心事重重的表情。
　　
拉過幾位馬會「幕後人士」及高層問何解會如此？乜莫雷拉唔係傷到要決定掛靴的嗎？
　　
個個眼神古古怪怪地笑，死都唔講原因，恍似頂級機密。
　　
嗱嗱，咁就難怪謠言滿天飛嘞！有冇人能夠挺身而出，將事實及真相用理據鋪陳，還呢位殿堂級藝術家騎師一個「清白」呢？
　　
最好，當然佢能以上周的體能狀態及拼勁，再次在香港馬場「復活」啦。阿門！
　　
講返今日沙田賽馬，相信潘頓會「瞓醒」嘞，因成手惡馬兼「夫卜」。其中蔡神仙隻「金馳」，上次大超班姿態彈離勝出，誇張到終點前收韁，加九分，應有排贏！但肯定大熱。
　　
此場必須留意上次眼前一亮新馬「歐洲傳奇」及「凱旋時光」，天生鬥心非比尋常。另加一匹從未上陣，但潘頓試閘一枝箭咁領放的「縱橫萬里」。呢場穿勻四隻啦！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。