港台觀眾林婆婆答「歌唱組合」狂數菜名主持忍笑勁專業 前TVB主播專業分析聽錯原因
最近有一段港台節目《香江暖流》中「極速15秒」的片段在網上瘋傳，事關家庭觀眾「林婆婆」反應極爆笑，問歌唱組合卻不斷狂rap蔬菜名，主持鄧添樂更不斷忍笑。片段瞬間成為網上熱話，就連TVB前新聞主播梁凱寧亦轉發片段讚「婆婆so cute」，著名傢俬品牌亦出post抽水宣傳產品。
【點擊睇林婆婆爆笑rap蔬菜】：
片段為港台節目《香江暖流》其中一個環節「極速15秒」，家庭觀眾可致電到節目，在15秒內答出最多答案的觀眾勝出獲得獎品。在片段中主持鄧添樂字正腔圓多次讀出問題「歌唱組合名稱」，不過可能觀眾林婆婆聽錯成「蔬菜組合名稱」，一直問：「係咪菜啊？」鄧添樂亦多次回答：「唔係菜啊，唔係菜啊，聽清楚先，問題係歌唱組合名稱。」
觀眾林婆婆卻繼續rap說：「菜心、白菜、芥菜、唐蒿菜、菠菜、生菜……」鄧添樂截停婆婆說：「未開始，聽清楚，歌唱組合嘅名稱，預備三、二、一。」豈料開始倒數後，林婆婆繼續rap蔬菜：「生菜、白菜、西洋菜、唐蒿菜、菠菜……」鄧添樂再度嘗試截停林婆婆說：「唔係菜啊！計梗時，仲有5秒。」不過林婆婆繼續蔬菜：「菜心、生菜……」到最後15秒倒數結束，原本一直忍笑的鄧添樂終於破功，燦笑說：「題目係歌唱組合嘅名稱，所以係冇分嘅。」不過鄧添樂也即時收起鄧添樂爛笑容說：「唔緊要，志在參與吖嘛。」安慰林婆婆。
片段昨晚在網上瘋傳，網民大讚鄧添樂忍笑好專業，EQ極高，還大讚他的聲音好聽；網民亦覺得林婆婆其實依然好精靈，在15秒內講出多種蔬菜名稱：「強烈要求畀返個獎婆婆。」、「其實兩個都好得意！婆婆把聲好可愛，主持又要忍笑而不失禮。」鄧添樂也在IG回應說：「唔到咁大迴響，多謝大家咁愛錫林婆婆，雖敗猶榮，賺哂大家嘅笑聲呀😂！其實每次玩遊戲，老友記都好緊張，試過問男藝人名稱，會口快快講錯汪明荃，問女藝人名稱，然後講咗鄭少秋，但每位都會嘗試到最後，好值得大家鼓勵😉。」最後鄧添樂還順便宣傳節目：「想同公公婆婆玩遊戲，無任歡迎呀！唔好睇小佢哋呀！贏咗有超市現金禮券，仲可以買🥦食，夠哂高纖😌」
林婆婆片段吸引不少藝人轉載，填詞人梁栢堅更將鄭秀文的《愛是…》改編成《菜是…》送給林婆婆。身為言語治療師的TVB前新聞主播梁凱寧留言說：「笑到傻咗，婆婆so cute👵！」更以專業分析婆婆為何將題「歌唱組合名稱」聽錯成「蔬菜組合名稱」：「首先粵語音節係由聲母、韻母、聲調組成歌唱（go1 coeng3）同蔬菜（so1 coi3），兩對詞語聲調都係1、3同埋1、3。聲母方面，唱同菜都係『c』，韻母方面，歌同蔬都係『o』，呢啲共通點加埋起上嚟，就容易令婆婆混淆啦。」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
