【曾智華專欄】《瞞天劫》令女性極爽

看電影，一如幫襯食肆，我有一個原則——好的就推介，以些微傳播力量，推動值得鼓勵的奮鬥者。差的，算了，不提也罷，無謂踩多一腳，令人血本無歸。反正市場自然會「懲罰」劣質出品，不用我加把嘴。

例如上周，冇癮，一連睇咗兩套新片，皆中途離場。原因？無謂浪費時間也。邊套？基於上述原則，當然不會透露。講明，不屬於我杯茶，不等於你也會抗拒。

幸而如今電影院之外，多咗幾個串流平台，有大量優質片可選擇。尤其某些戲院不願意上的各國片種，包括：泰國、土耳其、歐洲各國及印度。話說上周睇錯套「口水多過茶」電影，冇癮，中途離場，回家開Netflix。咦，有印度劫機片剛上架，名《瞞天劫》，一推出就打入最受歡迎榜，市場唔會死錯人，應該有保證啩？

果然，一睇就吸住，追到完場，連洗手間都忍住唔去，因實在爽死。

電影開場，為一個被打到豬頭炳款的「靚仔」接受警探盤問，希望查出佢為乜搞成咁。

開場已相當吸引。劇情跟住回帶到八個月前，呢個「豬頭炳」在航機商務客艙，以青年才俊姿態出現，狂追一位漂亮空姐。發展下去，人人估到，靚仔展開浪漫攻勢，用盡甜言蜜語，奪得芳心，並且搞大對方個肚，空姐當然視佢為未來丈夫。

就在此時，才俊向空姐訴苦，因生意出問題，需要一批鑽石填數，而知道剛剛有批鑽石會出現在稍後的航班，希望空姐替佢合作偷龍轉鳳，以挽救自己身敗名裂，然後開展幸福婚姻。

空姐應允後，竟然……在這航班中遇上劫機！跟著的不能劇透了，總之就是爽死，尤其女性觀眾，必定喜歡，快快睇啦！