【曾智華專欄】金像獎心水名單

上世紀八十年代，香港廣播業步入黃金期，百花齊放（相比現今，百花齊「殘」，陰公豬）。各大電台電視台除節目鬥個你死我活之外，也鬥搞專業頒獎禮，以加強自己台的聲勢及影響力，就此N咁多頒獎禮湧現。最多是流行曲頒獎禮，也有金唱片頒獎禮、舞台劇頒獎禮、電視節目頒獎禮……
　　
基於各有私心，極難傾掂一齊尊重一套標準再一齊搞，於是散檔！你有你搞，我有我搞，散晒，個個自己呃自己話「最有公信力」，真係講完照鏡都面紅。
　　
眾多頒獎禮中，只得一個能夠成功突圍而出，因大部分（聲明大部分）不具私心業內工作者，願意義務為阿公做嘢，積極奔走，無怨無悔，而各大電影工作者工會也積極支持，正是今年已到第41屆的《香港電影金像獎》。
　　
今屆有點搞笑，為呢個獎的「祖師爺」之一曾志偉，要孭起TVB總司令位，而今屆頒獎禮則由ViuTV獨家播。
　　
即係點？即係直接競爭！志偉要自己度節目撼散個「親生子」也。
　　
星期日晚，小弟當然擔定凳仔，睇睇自己預測的名單中唔中，又或者中幾多？包括：
　　
一、最佳電影：《給十九歲的我》；二、最佳導演：張婉婷、郭偉倫《給十九歲的我》；三、最佳編劇：譚廣源、葉偉平、梁永豪《正義迴廊》 ；四、最佳男主角：張繼聰《窄路微塵》；五、最佳女主角：鄭秀文《流水落花》；六、最佳男配角：張繼聰《飯戲攻心》；七、最佳女配角：王菀之《飯戲攻心》；八、最佳新演員：呂爵安《過時．過節》；九、最佳攝影：《風再起時》；十、最佳剪接：《正義迴廊》；十一、最佳美術指導：《風再起時》；十二、最佳服裝造型設計：《風再起時》；十三、最佳新晉導演：何爵天《正義迴廊》。