【曾智華專欄】方仔潘頓暗「互片」？

今晚又跑快活谷，未分析賽事，先講上周夜賽。我發覺有個現象不尋常，正是「方潘互片」疑雲。再追查下去，直覺事有蹺蹊，不知各方高人可否點醒一下，查找「真相」。

話說四度香港冠軍練馬師方嘉柏，旗下擁有六十幾匹馬，次次賽事皆有馬出，但奇，過去兩年多，竟與五屆香港冠軍騎師潘頓恍似絕緣，一次都冇合作，實在不太合理！

不但不合作，上周谷中賽事，竟發覺兩人可能暗暗較勁互片，作針對性部署。

方嘉柏素稱「谷中之王」，最擅長在跑馬地夜賽開大茶飯。吼準一日，唔聲唔聲連環直落殺幾場，單單過關W，已可食足一世！

上周賽事，「咖喱仔」明顯又要威水又要掠水，身為「西洋仔」，安排勁馬「黑桃火箭」跑西洋會盃，目標為攞獎外，再𡁻四隻W，分別為「星運明爵」、「國士無雙」、「赤子雄心」及「紫雲冰」。

成個部署，連我呢類儍下儍下馬迷都睇到，其他圈內人當然更心領神會。正路做法，絕不阻人一年一次搵食，家家有求嘛。

點知就在方仔這個重要日子，潘頓竟玩「隊爆」，騎隻「喜蓮勇感」，沿途睇住「黑桃火箭」（巡邏影片顯示，佢真係睇咗好多次）跑，最後五十米更博老命，擺明要鍊低對方，似有仇口咁款。

最終贏短馬頭，肯定吹脹方仔！不過，方仔到尾場也還以顏色，當潘頓騎大熱「勝神威」衝線時，最後一步被方廄「紫雲冰」擒下。

當晚本來方仔坐硬五W，結果畀潘頓攔路，冇咗天文數字金錢。呢啖氣，勢必造就日後另一場好戲！

今晚又如何？我專注研究兩個明刀明槍爭冠軍馬房！

蔡廄要「二雋」、「波爾多」及「奇寶」，姚廄則選「觔斗雲」及「精彩生活」。