【曾智華專欄】黃秋生的啤酒

過去三十年，小弟皆切切實實的「黃秋生迷」，因睇佢演戲乃至高享受！
　　
基於秋生並非早已定型的「巨星」，例如周星馳、周潤發、劉德華、許冠文或洪金寶等，故此可塑性極高。加上演藝學院出身，熟讀學術理論，又有演戲天分，所以扮乜似乜！
　　
其實佢單單在香港演戲，實在浪費，理應早早跳上國際第一綫，與荷里活的影帝級人馬作比試。不過，很可惜至今並沒有大製片家慧眼識英雄。
　　
黃秋生最新上畫的《白日青春》，也是一貫的精采，絕對可以作為電影學院演技法的教材。
　　
片中佢扮演一個廢老型的士司機，整個外形，就是香港人日日見到的躁底老司機。由髒亂頭髮到大肚腩，上身霉T恤，下身爛短褲，鞋襪亂咁配搭，一亮相，已說服力百分百。
　　
對劇中人的暴躁、麻甩、心急⋯⋯有感情而不懂表達的性格，拿揑精準，冇得唔服。
　　
難怪去年已在台灣金馬獎大出風頭，一舉掃下影帝大獎，肯定冇對手會唔服。
　　
此片乃新導演劉國瑞處男之作，第一部劇情長片，編劇、導演集於一身，藝高人膽大，以南亞裔難民作題材，出手已見天分。故此，掃下最佳新導演獎，合理！
　　
《白日青春》去年在台灣風光完之後，久久未見在香港上映，相信是要勒到《香港電影金像獎》舉行才出閘，希望口碑帶動票房。
　　
睇此片，我有個好奇，正是秋生的角色為酒徒，早年酗酒搞到換肝，之後仍無法戒酒，改為日日夜夜灌啤酒。戲中不少場面，為手持港產的生力啤。
　　
哈，究竟呢個是否植入廣告呢（應該係啩，因場場戲見晒牌子）？

若是，生力點解會搵呢個形象做「代言人」呢？