【曾智華專欄】遠水AI難救大火

人工智能（AI）浪潮殺到，消息公布，搞到好似真係應該人心惶惶。乜呢？正是美國高盛經濟學家研究報告，全球十八巴仙職位，將可能被AI取代，意即分分鐘有三億個全職工作職位被「自動化」，由智能技術取代。
　　
咁係咪應該好驚呢？係咪會有無數打工仔失業，唔知點生活，孭死政府綜援網呢？
　　
遠的，唔知。近的，甚至中短期的，以香港情況來說，簡直得啖笑。
　　
小弟在不同飯局中，遇到各行各業的大小老闆及機構管理人，不論大小，皆呻到樹葉都落。原因？你冇理由唔知的，正是全港人力資源乾塘，個個工種都缺人，可見將來都非常唔掂！
　　
疫情過後社會復常，但當特首大Sell特Sell——Hong Kong Is Back之際，弊！香港的勞動力（體力或腦力）的人才不但冇Back，反之仍然在大量流失中，而搶人才方面，則暫未見成效。
　　
唯一可做，急急「打蟊波」，先繞過重重關卡，盡快輸入「救命勞工」，否則會「死得人多」！
　　
你咪以為小弟作大。簡單，若你認識護老行業又或者醫管局高層，必定個個唉聲歎氣話你知——真係好唔掂！
　　
點解好唔掂？因護老院內及公家醫院之內的病人，根本無法獲得適當照顧。
　　
事實真象，各護老院的離世率，過去兩年遠比正常的多。除疫情侵襲外，嚴重缺乏人手執行適當醫療照顧，也是致命一環！
　　
放大看，其他工種包括機電工程、樓宇興建、保安護衞、旅遊零售、酒店餐飲……全部嗌救命。
　　
我認識的一位大集團CEO最搞笑：「碌Sir，如今慘況，誇張啲講，不少工種已到『識呼吸』者都要搶，因勞工短缺到乾塘，真係要等AI救命嘞！」
　　
香港急需AI協助自動化呀！