【曾智華專欄】無記應該把心一橫

做傳媒最忌偏聽，因為所有人都有自己利益立場（政治、機構、宗教、教育……），若你聽佢哋某一組人講嘢就以為真，咁唔該你返歸瞓覺！
　　
所以，對任何現象都應打開雙眼、擘開雙耳，再用識見、智慧及常識去分析問題。
　　
單講傳媒，一般人論及報章、電視及電台時，不少藐藐嘴話：「乜仲有人睇報章、睇電視及聽電台嘅咩？」
　　
佢哋有冇錯？一般般。若啱晒，以上媒體早已消失啦。對，如今因科技及環保關係，極多媒體百花齊放，唔得的當然淘汰。
　　
但報章有冇生存空間？會否被電子版取代？簡單，坊間幾份報章有免費網上版，但奇，實體版仍大量印刷，尤其周五。個別更奇，是大量讀者寧願畀錢買實體版，已唔睇網上免費版，點解？唔該自己用腦分析。
　　
到周二、周三、周五及周日，內附馬經的綜合報章及純馬經，實體報章更大賣特賣！
　　
講講電視。事實，TVB風光不再。不過，當你聽見人有點嗤之以鼻款話：「唓，乜如今仲有人睇無記節目嘅咩？Out晒啦！」
　　
講的當然自己冇睇無記節目，但佢哋以為冇人睇無記，也未免有點無知。事實TVB仍是最多人收看的電視台，而且久不久就爆出個「王牌節目」。例如近月的《中年好聲音》，你可知幾勁？收視二十四點，即超過一百五十萬人睇！
　　
其他電視台節目，根本難望其背。點解？無他，因TVB仍有大量「初老擁躉」。呢群粉絲口味喜歡懷舊，而且隨著人口老化，陣容愈來愈龐大，整個走勢，不容忽視。
　　
聲明，小弟不是TVB粉絲，但客觀分析，無記應全力主攻初老市場。理應把心一橫，唔好再把持不定十五十六，走去扮潮扮青春，乜都想要唔Work㗎！