【曾智華專欄】打到飛起點搞？

法國大暴動，總統馬克龍明言退休改革勢在必行，硬推今年落實，絕不撤回退休議案。事實，政治家為國家長遠大利益，間中必須下痛苦決定，逆民意而行。
　　
其實若選擇「滑頭」，容乜易，既然任期只得幾年，一於群眾要乜我畀乜之餘，違反國家長遠利益的，有人反對就一概唔做，留返炸彈畀下一任可也。馬克龍的硬闖，實在有點「可敬」。事實法國財政已陷水深火熱，唔動大手術，將會「死人」，作為負責任的領導者，必須有所抉擇。
　　
法國有其傳統政治文化，總統決定不得民心，利益受損者必同你死過，上街示威，甚至暴動，並發動全國罷工，向總統施壓。
　　
兩邊企到咁硬，點收科？事態發展仍有大量變數。
　　
上周法國處處打到飛起之時，老友「斯文V」正身處巴黎開國際會議，入住的酒店正在「戰場」旁，嚇到鼻哥窿冇肉，刺鼻的催淚煙通過窗篷滲入，警車鳴號整晚冇停，望出外火光處處，又冇人相伴，唯有WhatsApp回港尋找安慰。
　　
幸好群組中有位「國際P」，早年任職航空公司，要四圍飛，乜嘢大場面都見過，立即越洋向「斯文V」作指示：
　　
「國際酒店比較安全，也非暴徒攻擊對象，記住，咪外出，切勿多事湊熱鬧（呢點，我可能會，因有好奇八卦傳媒人天性）！快快搞清楚酒店的走火通道及安全門所在，要有心理準備，突發情況隨時出現，故此，傍身的要有清水、食物及毛巾。任何時候保證手機充夠電，孭住貼身皮包，將護照、信用卡、現金及必須藥物二十四小時睇緊。大件行李，毋須掛心，發生任何事，酒店之後仍會送還給你，這是我多年經驗。祝安全！」