專欄｜大阪打吡撐櫻花客勝

國際賽期展開，好多都係外圍賽或友誼賽，有啲球隊選人以試陣或練兵為主，加上有唔少強弱懸殊嘅對碰，觀賞價值唔太高。更何況球員踢完呢輪國際賽，好快要應付聯賽戰綫，部分處於爭標階段嘅球員，好可能喺今輪國際賽留力，所以艾爾都可以有多啲時間叉下電，哈哈。

國際賽展開期間，日本國內同時亦踢緊聯賽盃嘅分組賽，呢項盃賽只限日職同上屆日乙頭兩名嘅球隊參加，至今已經舉行咗31年。今日其中一場聯賽盃分組賽，就會上演大阪打吡戰，大阪飛腳上季勉強留得低，今季人腳補充唔多，監督比耶托斯執教能力實在麻麻，艾爾對於呢隊波無乜好感，飛腳開季五場聯賽仲未開齋，後防失波問題都幾嚴重，連埋上輪聯賽盃，暫時場場都有失波。

對手大阪櫻花今季起步都唔太順利，直至上仗聯賽先開齋，喺多蒙特成名嘅香川真司今季重返母會，仲有上季喺福岡黃蜂踢得出色嘅翼鋒哥奧斯，陣容實力無大幅減弱。值得留意嘅係，櫻花連續兩屆喺聯賽盃決賽飲恨，球隊無心爭聯賽冠軍，相信會繼續集中爭聯賽盃。另外，櫻花近五次作客飛腳全勝，加上戰意同實力佔優，推介客勝。艾爾

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。