【曾智華專欄】想擁有匹「金鎗六十」？

今年開始漸漸復常，不少行業鬆一口氣，其中之一正是賽馬事業。
　　
因疫情時，不止經濟差，人人不可入場，包括馬主。喂，馬主為乜養馬？正是要享受馬匹出賽時在沙圈指手劃腳，以及勝出時拉頭馬的威威風光。假若冇得威，為乜要一千幾百萬元買匹馬，再個個月畀七、八萬元養馬費？
　　
故此，過去兩年會員養馬欲明顯大降，搞到馬會要「告急」。
　　
跑馬跑馬，冇馬，跑乜鬼？所以，要延續賽事，必須激起會員的馬主欲先掂。
　　
幸好一切慢慢過去了，馬主重新有得威威嘞。故此，小弟預測新一次馬匹進口證抽籤，反應會非常熱烈，大量會員又開始發夢，希望刀仔鋸大樹，搵到匹「金鎗六十」或「遨遊氣泡」呢類「豆腐價錢，燒鵝味道」的超級良駒。
　　
剛剛收到馬會信，養馬許可證抽籤開始申請，四月底截止，想做馬主者，快快「去馬」可也。本年度規定，不論是個人馬主或合夥成員或賽馬團體經理人，均可同時擁有五匹馬。嘩，犀利，假若你好似「美麗家族」咁，幾乎個個是會員，再加上入埋其他賽馬團體，成棚加埋，分分鐘可以養幾十隻馬，到時又可以組成「出賽宗親會」，眉來眼去矣。
　　
有兩點要留意，冇錢咪發夢做馬主！因申請人要備有一百二十五萬港元資金證明，以及馬匹未出賽要先磅「退役費」十萬大元。原來馬會安排馬匹退役費，遠高於進口費，故此，慌怕你有興趣買馬，冇興趣安排退役就弊，故要先付費！
　　
你都想擁有匹「金鎗六十」或「遨遊氣泡」？咁就由第一步開始做啦！
　　
為明天賽事，蘇兆輝申請延期停賽。點解？為要贏埋「常常有餘」及「你知我拼」啩？