【曾智華專欄】打吡大賽選兩膽

馬季又一高潮，明日展開！一級賽女皇銀禧紀念盃，搞笑，只得五匹參加。意即爬返嚟包尾都有獎金！點解其他馬有錢都唔執？報名跑，當晨操試閘都好吖。
　　
馬圈乃一個離離合合的地方，本來「福逸」一直是巴度的私家馬，而佢與法國同鄉練馬師高伯新長年老友鬼鬼。今次突然易配改畀莫雅騎，巴度呢場則坐冷板凳，發生乜事？
　　
講講打吡大賽，總獎金二千四百萬元，冠軍獨佔一千三百多萬元，喂，跑一個圈返嚟，若贏就千幾萬元落袋，你係練馬師，你係騎師，你係馬主，心態會點？仲唔搏甩髀，將最後一滴潛藏能量都爆埋出來？
　　
今屆打吡，可以有好多爆冷因素。首先，所有馬皆未跑過二千米，意即無數據可參考。隻隻最長跑千八米，千八米與二千米，步速與氣量有所不同，故此千八米得，二千米未必得。
　　
另外，當然高分的「瑪瑙」著數晒，比起最低分的「一代天嬌」，相差十九分，賺到盡。跑平磅，理論上冇得跑！
　　
不過，你知我知，冇人會之前將參戰馬實力，在打吡大賽前畀晒你睇的。意即必定有冚手，大家無法摸清對手底牌，只會在打真軍時揭盅！一日未開閘，一日都是軍秘！
　　
呢類賽事，當然買頂級大騎師。難道重要大賽，幕後會假手於嘉里、霍宏聲或希威森呢類卡士人馬咩？若佢哋得，就唔使天價請莫雅等國際殿堂級巨星嚟啦。
　　
呢場應是「蔡氏宗親會」揸莊。「永遠美麗」或「自勝者強」W。但為保底，我會要埋「知足常樂」及「新力高升」。一於四隻二重彩複式，再買一注「永遠美麗」及「自勝者強」複式膽，腳拖「知足常樂」、「新力高升」、「喜旺駒」及「直線力山」！