【曾智華專欄】ChatGPT能貼賽馬？

人，就是喜歡一窩蜂，也喜歡將新事物吹到無限大，尤其涉及虛擬的、科技的，因為之前未出現過，故絕對可以「老作」！

你可以話我屬「老套怪」，因為凡新嘢出現，一定不會瞓身投入，反之，先旁觀一下，睇班友搞乜鬼，尤其涉及投資的，幾大唔落疊，寧願有放過冇殺錯。

就此，逃過不少蝕本之劫。久而久之，創下一個投資口號——新嘢留返畀新仔玩。因為新仔（年輕人）可以仆到即彈返起身，仆完又仆冇所謂，唔死得就可以。

但退休人士千祈咪制！即如跌倒，可能斷手斷腳斷盆骨，未必駁得返㗎。投資也如是，退休的生活費，千祈咪亂博，聽見班合法或非法騙子亂吹你就買，死咗冇人可憐！

最近當然又人人大講特講ChatGPT，形容到出神入化，將可取代大量工種，包括律師、醫生、會計師等專業職系。兼且用戶數量增加似火箭升空，於是有人話已經市值上千億美元計，認真誇張。

係真唔係真，小弟冇做過研究，唔敢下定論。今次當然也是抱著「睇新嘢」心態，先靠邊站，睇睇呢種近乎「全球新廁所」的玩意又如何發展。

不過，講到咁巴閉，我又好奇問問教授級老友點睇？

佢笑嘻嘻指住個ChatGPT回答畫面：「碌Sir，好過癮㗎，我問佢林鄭老公邊個，佢答梁振英！我又問佢梁振英老婆邊個，佢答梁愛詩！」嘩嘩，咁都得？同街邊吹水阿叔有乜分別呢？只要冇準確資料輸入，佢就會亂噏。

當然，馬迷最想問佢：「喂喂，今晚邊隻跑出呀？」若識答，咁就必定顛覆成個馬圈嘞。
　　
今晚主攻研究二班一千米，我喜歡「狀元及第」及「心之行」，兩皆有賽績支持，排好檔，對碰W，再Q、PQ可也！