星8卦｜「大眼」搞散老闆頭家 得罪正室被雪藏 結果要搵老襯埋單

「大眼」如果唔將自己啲嘢踢爆，都唔知做藝人其實都係表面風光。不過又咁講，「街哥」老闆係刻薄，但「大眼」當初點姣「街哥」俾自己上位，呢個圈都有唔少目擊證人。講到攞番啲錢，就老豆同仔都無情講。

做得老闆，只要旗下藝人肯，邊個會有得食唔食吖，「街哥」同「大眼」搞埋一堆，連「正室」都覺得今次有啲離譜，所以單刀直入打電話俾「大眼」問佢點解要搞自己老公。

「大眼」果然見慣世面，即刻扮無辜話同「街哥」只係江湖傳聞，叫「正室」千祈唔好誤會，自己其實係同合作緊嘅「老粗」拍緊拖。「老粗」高高大大，雖然無乜文化，但「大眼」解釋接受唔到年紀太大嘅男人，如果真係有嘢，就唔會自行踢爆真正嘅男友。

事實佢又無講大話嘅，「老粗」份人好爛滾，而且專食身邊女人，就手嘛，「大眼」改造後樣靚身材正，又夠主動，兩個人玩咗幾次一夜情，但心裏明白開心過後咪認真，「大眼」無估到「正室」咁直接，即刻搵「老粗」嚟過橋，仲話兩個人愛得火熱，求「正室」唔好拆散佢哋。

最抵死「正室」真係搵人去問「老粗」係咪真有其事，「老粗」梗係死都唔認，費事有乜事影響自己事業。正室知道嬲到癲，更加證實佢同「街哥」有路，而且見「街哥」今次太認真，結果收番晒自己所有資金，連屋都唔俾佢住，因為咁多年都無人知財政大權係「正室」手上。「大眼」知道做錯投資，泊錯碼頭，「正室」又唔會俾好日子自己過，所以喺被雪期間搵到另一老襯玩結婚，但求有人認頭扮幸福挽留一啲面子。

【相關文章】：

星8卦｜「冠軍」被利用拆散有婦之夫 結果情人遇意外變植物人 決心落仔再嫁有錢佬

星8卦｜「白淨」恨做有錢人愈嫁愈豪 遇擦鞋仔投資錯誤冇咗一半身家！

星8卦｜「王子」惡死橫行 對住父母超級孝順 娶老婆首要兩老Like