【曾智華專欄】被騙也是交學費

香港，愈來愈多騙案，愈來愈少暴力罪案！點解？因為既然靠舒舒服服的呃搵到食，為乜要動刀動槍咁危險呢？
　　
有錢地方有騙子，愈多錢的地方愈多騙子，此乃推諸四海皆準，甚至跨時代的定律。
　　
點解咁多人受騙，騙之不盡？任何執法者都會話你知，可能行騙專家也會話你知，四大因素：一、貪婪；二、無知；三、空虛；四、心虛。
　　
騙子大多是市井心理學家，兼且為出色「演員」及「游說家」，更重要，面皮極厚及耐性驚人。
　　
其實騙子手法萬變不離其宗。多數先畀著數第一批「信徒」，佢哋真正有錢賺之後，就會游說第二批「信徒」，又證明有錢賺，就會愈來愈多人信，愈來愈多人入局，愈來愈多人賺，到全民皆信必賺時，就是騙徒起撈時機，將所有貪心無知者「一網成擒」。
　　
龐氏騙局歷久不衰，同樣手法呃完又呃，皆因人的劣根性從來冇改也。
　　
上周《星島申訴王》爆出的千人大媽傳銷團，也不過是翻炒又翻炒幾十年前早早在港盛行的半行騙手法。可能呢類傳銷「神藥」𠱁人入局的橋段，香港已冇乜人上當，於是就利誘引內地大媽到港上釣。
　　
可能不少大媽又貪又蠢，見有著數，到港玩又有「必賺」生意，所以就自動「撼頭埋牆」。
　　
其實呢類「傳銷公司」一如倫敦金，必有爛仔律師在後面設「保護網」，將一切法律責任推得一乾二淨。因過程的確有「貨」，又的確有「佣」，又的確簽晒買賣「同意書」。
　　
一如某倫敦金騙案，上到法庭，辯方律師盤問事主：「你係成年人，讀過咁多書，受過高深教育，會唔睇清楚就亂咁簽合約的嗎？真的非自願？」
　　
水魚也要負上被呃的責任啊！