賭王四房大仔何猷亨撈過界做演員？與陳瀅分手後感情生活成謎
已故賭王何鴻燊與四太梁安琪的大仔何猷亨，出身於顯赫家族，家財萬貫，生活當然受到各界注目，尤其是「何家戀事」，何猷亨在2011年與讀劍橋大學的富家女陳可欣拍拖，但兩人拍拖未一年就分手，其後先後與o靚模文宇、陳凱琳、劉佩玥、梁政欣等等傳出緋聞，到了2015年被爆與陳瀅密遊日本札幌，但拍拖9個月後又傳分手，期間兩人屢傳復合，不過只稱「再見亦是朋友」，何猷亨的生活變得低調，直到近日又見到何猷亨的踪影，今次更撈過界走去拍劇！
【點擊睇何猷亨「撈過界」相片】：
電影《與你相遇的日子》日前在葡京人舉行開鏡拜神，四太梁安琪和何猷亨都有出席，因電影希望牽動澳門人的集體回憶，將澳門的獨特文化搬上銀幕，何猷亨為電影演出相片亦有在網上流出，相中見到他在片場拍戲表現淡定，官仔骨骨甚有明星風範。畢業於英國倫敦大學國王學院工商管理系的何猷亨，近年創辦「葡京人綜合渡假村」，負責開展澳門龐大的酒店企劃，將父親產業發揚光大，但其實他向來都熱愛表演，尤其是唱歌方面，經常有他的唱歌片段在網上流出！
去年10月何猷亨為出席《華仁音樂節活動，當日他先個人唱出《這麼近那麽遠》和《誰明浪子心》，以及與舊同學合唱《白玫瑰》，他搞笑地說：「大家讀緊華仁，dry唔dry？我話俾你哋聽，我讀完都好dry！你信唔呀？唔好睇咁多報紙雜誌，假嘢嚟架，我真係唔係浪子，我係戇子，戇直嘅男子。」
何猷亨亦曾表示讀書成績欠佳：「我好細個已經想出嚟做嘢，張CV要見得人，16、17歲已經出嚟做intern（實習），自己要求嘅，第一份工係酒店，最主要做room service（客房服務）、house keeping（房間打掃），同埋HR（人力資源部）。坦白講我有呢個家族背景，點都會有少少壓力，所以第一間酒店揀咗英國，英國冇人知你係邊個，去一個冇人知你背景嘅地方，人哋見到你都唔知你係邊個。（在酒店做最基層工作有受氣？）都唔係受氣，自己嘅經歷會同自己講唔好犯同一樣嘅錯。」何猷亨又稱爸爸從小就教手抱都要叫別人「阿哥」：「手抱住嘅BB，你都要哥前哥後，就係待人處事，禮貌又好，畀人嘅感覺係應該要咁。」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
