【曾智華專欄】剃完眼眉吐氣揚眉

馬場，百分百英雄地。個個騎師及練馬師皆想贏贏贏，贏馬有得威又財源滾滾。不過，一如打仗，你想贏，有冇犀利武器先？
　　
例如美國乃霸權國，恰人可以唔使本外，更分分鐘當聯合國冇到。炸人，十之六七冇經聯合國安理會批准，正因擁有全球最犀利的武器，不少國家皆在其保護傘之下。
　　
同理，放在馬場，練馬師及騎師，優質馬匹正是其「核武」！若唔夠子彈，或武器弱雞，真係講多無謂，必定被當隱形！
　　
故此，騎練皆瞓身爭取最佳馬匹。事實，高班馬等於印銀紙機，有匹「金鎗六十」或「美麗傳承」，真係收錢收到手軟。
　　
既然高質馬咁重要，練馬師當然珍而重之，幾大保住佢，以免被拉倉。
　　
不過，被拉未到最慘，最慘情是，一匹高質馬在你倉內毫無表現，點知去到另一馬房，立即脫胎換骨，變咗「犀利核彈」，轉倉即勝。咁真真情何以堪，眼眉簡直被剃到清清光光。
　　
馬迷必定知我講邊匹，正是馬主高價購入，希望跑打吡的「直線力山」。本養在希斯馬房，今年頭三次上陣皆毫無表現，次次輸到甩轆，場場幾乎包尾。終於馬主羅琪茵決定拉倉，轉到方嘉柏馬房。
　　
哎吔吔，二月五日在希廄時，出賽仍跑尾二。點知二月二十六日，即二十日後，方仔又安排佢出賽，嘩嘩，變咗另一匹馬，直路如飛殺上，輕鬆彈離贏！
　　
希斯當然畀人笑到面黃兼搵窿捐，點呢？邊處跌低，邊處彈返起！周三即發神威贏練馬師王，少少吐氣揚眉，頂住先。
　　
明天一班千二米，只八隻參賽，四隻屬「蔡氏宗親會」，真係任佢「開」。我一於捧「速遞奇兵」，季半冇入Q，話晒G1馬，今場交代！