【曾智華專欄】《申訴王》命中市場

做傳媒，必須百分百精準面對市場，掌握受眾需要，千祈咪「射歪去隔籬」。
如今電子傳媒，無論電視或電台的滑落，除因互聯網興起外，自己的節目未能吸引大眾，也是主因。
小弟昔日長期打「電台仗」，當然對爭取收聽率有些微經驗，故此，才大膽講一句——今時今日電台唔係冇人聽（朝朝幾十萬部汽車在路上，司機冇得睇手機），而係⋯⋯問題在電台管理層身上，正是種瓜得瓜，種豆唔會變咗瓜㗎！
報章也同理。印刷傳媒因成本太貴，轉電子化，合理。咁唔代表應該少咗人睇「報紙」，問題用乜「睇」矣。你的內容吸引，讀者又點會流失？故此，掌舵人要不停捉摸市場需要，作
出改革，鎖定讀者口味「發射」。中的話，自然廣告滾滾來！
三月一日，《頭條日報》開始大改革，日日有主題，率先登場的是《星島申訴王》，設立熱線9199 9933，收料然後行動，睇嚟冇一隊人去做，難有效果，應該相當重本。
做傳媒，必殺秘笈為替小市民申冤抱不平，因大部分政府部門「唔踢唔郁」，若你單單寫封投訴信，結果可能石沉大海，也可能會收到官樣答覆——謝謝意見，我們將會跟進⋯⋯然後關人過關。
但見諸傳媒就唔同，因公關部必須剪低，傳畀所有管理層睇。局長/署長一睇，必責成下層——唔該你搞掂佢。如此，由上而下，即掂。
人要面，樹要皮，冇一個高官會接受部門負面嘢經常曝光也。更甚，若畀特首睇到，畀個電話「關心吓你」，咁就真係瘀死！所以，若《申訴王》能成功整返幾單大嘢，為市民申冤，咁一定會響招牌，然後起紙，然後廣告滾滾來！睇睇事態會否如此發展先。