【曾智華專欄】夕陽醫生，朝陽醫生

與幾個資深醫生晚飯，講吓講吓，講到醫生界的市場起跌大趨勢。
　　
兒科聖手阿Y，曾幾何時，忙到踢晒腳，豬籠入水。講緊的，只是十年八年前。當時內地日日一車車「金叵羅」運落嚟香港，內地的富貴家庭，個個得一粒，任何大小有關醫療的事，皆唔多信居住地醫生，故此，必定坐過關豪華車到港，普通到打支預防針也如是。
　　
有次小弟感冒，撞上Y醫生診所，嘩，坐滿普通話阿媽及小朋友，個個周身名牌。
　　
其時真係位位「金礦」，因睇病從來唔問價。
　　
不過，又係疫情殺到改變一切。中港交通斷纜，等於Y醫生「血管閉塞」。最弊同一時期，香港出生率大跌，跌勢非常得人驚。內地客又冇，香港客又縮，難怪阿Y話：「得閒到成日躲在診症室剪手甲、玩手機。碌Sir，若果有世侄讀醫，記住叫佢咪揀兒科呀！」
　　
一個潮落，另一個潮則湧起。在座的眼科醫生阿S笑到蓮子蓉咁口：「唔讀兒科冇問題，想做『月球醫生』，一於讀眼科啦，可見將來都必定豬籠入水㗎！」
　　
S哥指出，自從電腦及手機全球大盛後，一般人眼睛的衰退速度大大加快。幼稚園生已開始日日對住手機、電腦學習或打機，一路長大，一路日日睇Mon，對眼球的侵蝕，年年月月日日進行，故此，各種眼病的求診者直線上升。無論公院私診，完全不愁冇病人，中港唔通關，都一樣日日爆瀉。
　　
另一為骨科，在座的骨醫K話：「又係與睇電腦有關，兒童坐姿甚少由細開始正常，故發育時期脊椎已有毛病，我有不少十歲左右病人，一睇X光，發覺脊骨彎晒。呢類症狀，未來也睇之不盡啊！」