【曾智華專欄】騎師一哥≠馬會一哥

上周日真快樂，因見到偶像女騎師賈傑美，跑八場有五場入Q，上周六本欄正正指明要捧佢，你可有大豐收？

騎師也是人，十人生九品，有啲似賈傑美般可愛，有啲則似潘頓般火爆。潘頓貴為「香港一哥」，騎功無可置疑。不過，有騎功並不代表有騎品，尤其近年，可能成績愈來愈好，帶離晒，慢慢形成咗一種目中無人心態，真係鬧人唔使本。

其實佢口舌招尤早有前科，也曾被重罰。不過冇改進不止，鬧吓鬧吓，連唔應該鬧、唔鬧得的人也照鬧，怎不惹禍上身？受薪董事方顯韜剛剛上任不久，你潘頓睇唔起佢，可以私底下埋怨，甚至對佢處罰的判決上訴，但萬萬不可公開鬧，此乃天條！
　　
因咁搞法，馬會管理層一定出手，以免騎師冇規冇矩都過到骨，咁仲成世界？你係騎師一哥，但絕非馬會一哥，唔該搞清莊閒，咪冇大冇細，作出極惡劣的示範。

回想管理電台的日子，小弟也不時被朋友問：「喂，碌Sir，點解嗰位唱片騎師/主持收聽率咁高，又有大量廣告，仍然『被離職』呢？」

正常情況，任何電台當然錫晒受歡迎及「生金蛋」的主持。不過，人生就是如此，個人修為力低的，很易先而恃寵生嬌，繼而目空一切，視規矩如無物。起初管理層也必會好言相勸，不過⋯⋯一旦當事人覺得自己是「廣播之神」時，就真係冇得救。因佢會脅持埋電台編輯權，肆意橫行。咁發展，結局一定是——自我毁滅！

今晚快活谷賽事，一於捧告東尼三匹評分未盡，仍在進步中的年輕馬——「加州得力」、「加州一寶」及「正氣青驅」。難得全部執靚檔，WP三串七過關可也！