【曾智華專欄】你一定估我唔到

電影史上的偵探片或兇殺片，一定數以千計。殺啊殺啊殺，套套死人，咁點估到劇情發展及誰是兇手呢？
　　
本來太陽之下無新事，你諗到的，其他人也會諗到，咁點跳出既有的思維呢？
　　
呢呢，小弟正有一朋友阿N，腦筋精靈到不得了，一百部兇殺案，起碼有九十部睇五分鐘，已知邊個係兇手，其他十部，也有八部十五分鐘之後能準確預知結局，剩返兩部也從不用睇到尾。
　　
其實大部分兇殺案，導演都會自覺或不自覺地，早早提供線索，故絕少會出人意表。
　　
好嘞，今次小弟認定，專玩踢爆的阿N，也肯定無法在四分三部戲前，知道這套電影的布局，因實在太難以想像！
　　
此片正是《人肉搜尋2》。四年前《人肉搜尋》公映，票房爆大冷，極度小本製作，只花上七百八十萬港元，比不少港產片還要低成本，但上畫後大收特收，簡直狂收，勁賺七十五倍利潤，非常驚人。唔使問阿貴，當然N咁多老闆攞住一篋篋銀紙，去搵導演安尼遜查格提，求佢快快開第二套，希望又掘中另一個「金礦」。
　　
今次安尼遜唔自己落手，改用上集剪接師韋梅克及尼克莊遜任編導，兩人的想像力，你睇完就知，冇得唔服，簡直天馬行空，脫離一切你能夠估到的軌跡。
　　
當然，睇完之後，挑剔友可能批評——大話西遊！但從事創作者皆知，能夠搞出一套你一邊睇，一邊想拆局，但又必定失敗的戲者，功力點會「大話西遊」咁簡單。完場前十分鐘，觀眾個個「哦」的一聲，服晒，咁都畀佢諗到。
　　
《人肉搜尋2》由開場緊張到尾，根本冇小便位，若非要瀨，你一定會死忍，直至真相大白！