【曾智華專欄】堅決永不代人投注

今日標題，是否看似好無情？喂，叫你順便幫手投注，使乜出到「堅決永不」咁絕啊？
　　
昨天老友高佬M來電：「碌Sir，小弟在外忙緊，可否替我買條十蚊雞六環彩，號碼為⋯⋯下周見到面畀返錢你，中就請食大餐！」
　　
唉⋯…又嚟⋯…又要做「衰人」了：「M哥，唔好意思，麻煩另請高明！因我三十年前已發誓，永不再替朋友落注，唔好意思！」
　　
「有冇搞錯？幫朋友做少少嘢都托手㬹？」
　　
阿M的反應，完全意料中，因久不久就有朋友提出同樣要求，我也是堅決拒絕。幸而詳細講出背景故事後，個個明白，再冇埋怨。
　　
背景故事，三十年前一日，跑夜馬，老友肥C來電，有如高佬M，託小弟到投注站買條六環彩（其時未有手機投注）。心諗，Easy啦，反正得閒，踱步到附近投注站，按畀出的六隻賽駒號碼，填咗張飛，十蚊雞搞掂。
　　
轉眼跑完馬，枱頭電話大響，傳來震耳欲聾歡呼聲：「阿碌，發達喇，發達喇，六隻中晒，全部W，派二十幾萬元！快啲約期食日本菜！我已通知老婆大人，一於兩對夫婦，狂擦一餐！」
　　
原來係肥C，嘩，咁犀利，速速攞佢張飛出嚟對對先⋯⋯晴天霹靂，簡直想撼頭埋牆死咗佢，因最尾一關填錯號碼，變咗食白果！
　　
你話點辦？一心幫朋友，搞到「成褲都係」。難道自己「派彩」二十幾萬元（當時月薪一萬元）？
　　
唉⋯⋯終於誠心道歉，但就咁冇咗個老友，仲畀佢老婆在人前人後怨足三十年（當然有這樣那樣的「懷疑」啦）！
　　
經此深刻教訓後，話知你係主席、總理、特首，搵我代投注，一律堅決Say No！
　　
明天又跑大賽，香港金盃跑平磅，輪到「浪漫勇士」鍊低「全鎗六十」！
　　
香港經典盃，一於捧偶像賈傑美！