【曾智華專欄】葉劉「成功爭取」

今日標題，大家有冇好奇怪，點解我講成功爭取要用引號呢？有乜意思呢？
　　
小弟並非「盲公陳」，又冇水晶球。不過，浸在傳媒圈多年，觀察政治，當然有少少心得。故此早前在本欄「公布」，葉劉必能「成功爭取」，財爺將會增加足球博彩稅，不過，幅度不會太大，若大到馬會高調反彈，則盞大家冇癮。
　　
政治圈與娛樂圈相若，好多嘢其實做場戲，早早有晒劇本。劇本中人人有個角色，最好大家都得益，否則就算冇著數，都要鋪排各方落到台，咁就應該「順利演出」，皆大歡喜。
　　
我睇呢次加足球博彩稅也有劇本！背景為香港大大財赤，當然要加這樣那樣的稅。在新稅種不能開之下，財爺當然要睇睇邊度落手會最少反對聲音啦。簡單推測，加香煙稅及足球博彩稅，最「好蝦」，因對方也反抗無力，故此必定中。
　　
若如此，「政治劇本」可能是：反正要加，咁就益吓人「成功爭取」喇，搞搞公關。
　　
首先，通過不同渠道通知「吸煙與健康委員會」及「禁煙團體」，你哋大力提出訴求啦！
　　
然後再揀吓邊個政客或政治團體要賣帳。咦，正喎，不如「賣」畀行政會議召集人、位高權重的葉劉啦。等佢跳出來指手畫腳「為民請命」，然後嚇到馬會彈起，開火還擊，要求交換條件，葉劉則一於企硬，誓不低頭。劇終，財爺聽到民意，從善如流，接納新民黨意見。
　　
就咁，「劇本」順利演出，財爺無風無浪「回應民情」，決定增加煙稅及足球博彩稅。
　　
葉劉及其政黨為民請命，成功爭取，更協助政府減輕財赤，大大有功，錫晒！
　　
馬會呢，好似輕微受損。不過，唔怕！好快會還盅，必有糖食。
　　
玩政治，有來有往㗎。