【黃庭桄專欄】放狗感悟

晚飯後和太太到屋企附近散步，沿路見到不少菲傭放狗，但她們不是讓狗狗隨意走動，而是三幾個同鄉就站在路邊談心，一傾便十多分鐘，狗狗只能被逼在原地站立不動。
　　
想向左走幾步嗎？想去草地自由自在地奔跑嗎？發夢吧！只見菲傭拉緊狗繩，狗狗邊度都唔使去。
　　
「好哋哋一隻動物，點解要用繩綁住？失去自由，會開心嗎？」太太一向反對有馬戲團的存在，每次外遊必定反對參觀動物園，她的見解不無道理。
　　
「你試想像一下，如果有朝一日，外星人侵略地球，將人類捉去火星，用一個個鐵籠困住，然後畀外星人當動物園咁參觀，你自己會有乜嘢感受？」
　　
她愈說愈激動，義正詞嚴，「你條頸如果被鋼圈箍住，外星人逼你去跳火圈，又要在鋼線上踩單車，手腳慢啲，就用皮鞭狂鞭你。每日可能只得一兩個爛蘋果當飯食，你話慘唔慘？」
　　
我不禁抬頭，好彩未有發現UFO，暫時不用被綁架去火星加入馬戲團。再低頭望一望呆在路旁的狗狗，牠那無助的眼神，像發出求救訊號。I know what you feel！
　　
在佛教的生死輪迴說法，人類會因應生前所作善與惡，死後會按果報，投生到六個去處之一，被稱為六道。六道中有三惡道，分別是地獄道、餓鬼道和畜牲道，而畜牲道是相對地受苦較少的，待捱到業力消盡，才有機會投胎重新做回人類。
　　
感恩今世能生而為人，而不是做牛做馬做隻蟻，活著，多好！