【曾智華專欄】九大挑戰全部硬嘢

香港馬會在國際馬壇的江湖地位，究竟有幾高？答案簡單，你睇睇應家柏總裁坐乜位就知——亞洲賽馬聯盟主席！

幾日會議中，應總精力爆表，講得又玩得，分析完國際賽馬業九大挑戰後，到晚上聯歡會，又唱又跳，帶領參加者玩到癲。

相比其他華人領袖，多數木木訥訥、含含蓄蓄，要與不同國籍人士打成一片，略為蝕底。中國領導人更加唔使講！唯一一位玩得的，只有剛逝世的江澤民，豪情奔放，又唱又跳，故此當年出訪外國，令國家形象大豐收。講返「九大挑戰」，真係瓣瓣都唔簡單，好惡搞。這個「惡搞」，令我想起昔日做中層管理時，難忘的一幕。

升到中層，開始有機會在高層會議中坐第二排，只聽不講，因自己兩層上司在前排。
　　
某次會議，一位中高層阿A匯報工作時，提到：「這項工作難度好高，失敗機會好大⋯⋯」

佢都未講完，立即被大波士截住，當住全體管理人面前噴：「A先生，你坐幾高位，擔當乜嘢角色，收幾錢月薪，有幾大權，究竟自己知唔知？工作唔難，使乜你做？大家只想知道你會點克服佢，完全冇興趣聽有幾難、失敗機會有幾大，冇人要求你一定成功，只想知你點會令佢成功！」

一面屁之後，紅都面晒，立即收聲。從此冇人再敢在大波士面前呻工作困難，個個只諗點樣「死掂佢」，以免畀人兜口兜面省鑊金！賽馬事業面對挑戰，當然勁，但各地總裁個個幾千萬元年薪，唔該你哋「死掂佢」！咪呻！

今晚又跑快活谷，小弟再捧「谷中王者」何澤堯！尤其以下四隻：「百勝名駒」、「得力寶駒」、「風中勁松」及「赤火驍龍」，一於WP過關可也！