【曾智華專欄】火速彈開

江湖之內，乜人都有，尤其涉及名利的商界及政界圈子。
　　
所有江湖中的頂級人物，必定知道自己身價，故凡到任何場合，尤其乜乜物物酒會，「正常地」必有三九唔識七者，想撞埋嚟攬住影張相，然後四圍招搖——喂喂，你睇，我同誠哥好熟㗎！
　　
可是全部有頭有面人物皆非懵人，點會咁易畀你借個膊頭撳？儍的嗎？
　　
很久很久以前，小弟認識的高官及大議員（當時未有普選，唔興親民）個個身嬌肉貴，階級觀念濃厚，故此凡出席任何公開場合，一定部署三五個隨從，做乜？專做擋駕。
　　
你想博懵埋身影相？好⋯⋯難嘞。
　　
後來香港日漸民主化，再唔可以擺官威或扮政治大佬大姐，咁點呢？隨從一樣有，但不能太明顯拒人於千里之外。故此，「主角」必須自己識得執生，尤其女性，例如鄧蓮如或陳方安生，當年萬計咁多「街佬」想在雞尾酒會之類場合殺埋去黐張相，咁點呢？犀利，佢哋身邊人及自己個個一眼關七，你未埋到兩米範圍，「主角」必早已閃身走咗。呢套功力，個個有！
　　
拉返到今天，講吓立法會，突然出咗幾十個無名無姓新丁議員，全部想博上位曝光，咁點呢？易！一見局長高官接受訪問，佢哋就黐埋去後面做「布景板」。
　　
此外，搞掂小小事就大大聲四圍嗌——成功爭取、成功爭取！
　　
大家咪笑佢哋，政圈就是如此，若你唔寸土必爭，真係鬼知你係邊個？
　　
不過，立法會也有「階級」之分，資深議員最大避忌為被新丁議員拉住影相，抽水見報。
　　
所以，個別老江湖議員同我講：「碌Sir，行行都講卡士，議員也如是，點可以成日同唔夠班者一齊曝光㗎，故此，應閃則閃！」