【曾智華專欄】誇張拉頭馬陣容

V型反彈、V型反彈！講緊乜嘢V型反彈？正是拉頭馬陣容的V型反彈！

過去兩年雖云馬照跑，但你知我知，場面冷清到非常嚇人。無論沙田或快活谷，只在一個個空空洞洞的馬場競賽，不但毫無氣氛，相信作為騎師及馬匹，都會非常冇癮，兼且覺得如此環境跑馬，簡直好似假假哋。

冇觀眾，冇賓客，更冇馬主。跑完一場，匆匆又跑第二場，人人皺晒眉頭，個個戴住口罩唔識笑（今天雖仍有口罩，但個個眼神傳出笑意）！

點解近兩年養馬意欲急降，少咗好多人想做馬主？純經濟問題？當然唔係啦。

將心比己，你幾百萬元買隻馬返嚟，每月七萬元、八萬元養馬費，為咗乜？儍嘅先會以為隻隻係「金鎗六十」或「加州星球」。做過馬主者，無不知道養馬蝕本機會七成。

不過，願打願捱，為乜？正為作為馬主的虛榮感、優越感。以上兩感，來自可以呼朋引類落沙圈指手劃腳，扮畀「策騎指示」（大騎師睬你都儍），在朋友面前英明神武。好嘞，若一旦贏馬，更發達，威風八面，成棚好友高調衝落凱旋門影頭馬相，擺個V字手勢，然後拍拍騎師膊頭讚句：「叻仔！」

老友，由2020年至2022年，以上場面根本冇晒，咁我為乜咁儍，花幾百萬元做馬主呢？好嘞，如今唔同晒嘞，每次跑馬，再可威威嘞。尤其做生意的，若有海外夥伴到港，帶佢哋入一次場，分分鐘又做成另一單大生意！

故此，如今誇張的拉頭馬陣容頻現，好事嚟㗎，愈旺愈多善款，福有攸歸！

講吓今晚先！「谷中王者」何澤堯剛在沙田食白果，開餐時間到！「銀進」、「育成精彩」、「正氣青驅」、「合夥年代」及「賞心星」皆有W、P機會，捧埋佢做「騎師王」可也！