【曾智華專欄】超筍消費體驗

人人話日日通脹飛升，乜都貴晒，有如上世紀七十年代許冠傑的Hit爆經典歌《加價熱潮》，總之乜都加加加！

係真唔係真？Yes And No！有啲嘢的確不停價格上升，但有啲嘢又確比幾年前平咗，又甚或冇加價喎。

舉例——樓、股票、報章、衣着、小巴牌、串流電影平台……呢呢，前日我又遇上一個超級消費體驗，真係唔知點解會咁筍。

我一星期總有一兩日去睇長者早場，指定地點為荷里活廣場，因消費一百元，有三個鐘免費泊車！一百元，真係容乜易花吖。電影門票二十五大元，通常睇完戲，到任何一家超市或連鎖藥房萬寧執三兩件貨，總之湊夠一百元就掂，然後即去服務處蓋印，換免費泊車。

哈，日前有奇遇！入到萬寧大藥房，隨手攞咗盒染髮素，孖裝八十五元九角，再加一包三支裝牙刷，十七元，咁就過一百元啦。

畀錢時，收銀姐姐話：「先生，今日若果你買任何三件產品，總之夠一百元，就送李錦記舊裝特級蠔油呀，執多件啦，一蚊都得㗎喇！」吓，筍成咁？家中不停用呢隻蠔油，故此，知道每瓶公價二十六元八角。咦……剛才買的染髮素及牙刷已經是特價，平咗。如今買一百元，再送二十幾蚊，咪即係總數平過七五折？

玩咗一朝，泊三個小時車，睇咗場電影，加消費一百元有染髮素孖裝、三支牙刷，再嚟一支舊裝蠔油，共付約一百三十元。

喂喂，是否筍到難以想像呢？究竟呢家連鎖藥房條數點計嘅呢？搞到我以為入咗時光隧道，返咗去上世紀七十、八十年代。

小弟並非慳家一族，都幾喜歡使錢又好少計「婆仔數」。但若以上平成咁的消費體驗，也真係會成朝都陰陰嘴笑，因為好似突然中獎咁開心囉，感覺好正。