【曾智華專欄】「串」主席？即聘用

一處鄉村一處例，各地皆有不同文化。
　　
舉例，從前的香港教育制度，絕不鼓勵學生「多多事實」，上堂要乖乖聽書，千祈咪多口挑戰老師，否則後果堪虞。
　　
小弟天生多口，故此在中小學時吃盡不少苦頭，除被體罰外，成績表評語更被寫上——Too Talkative！結果返到屋企又畀老父「執兩劑」！
　　
不過，後來到美國讀大學，文化一百八十度轉變。所有香港同學靜如深海，因慣咗「香港式」文化。我呢，簡直大解放，堂堂舉手發問，過足癮。
　　
有日教授拉小弟入辦公室問：「Luke，我好好奇，點解香港來的學生，個個都好似啞的（時為上世紀七十年代），永遠不發言，也不問問題？」
　　
其實美國早年國力大幅拋離其他國家，正正可能與教育制度及文化有關，「全攻型」開放學生的思維及天分，搞到個個勇字當頭，信心十足，敢講敢做（當然以名校為主啦），形成「捨我其誰」風氣。
　　
今日講個故事。老友「高佬B」在香港屬打工皇帝級數，有日收到獵頭公司電話，邀請到一個美國大集團見工。B哥當年五十歲，心諗：「都好吖，久聞此集團大名，有機會打入佢哋管理層，觀摩吓都好。」
　　
要加盟國際集團做高層，必須要一級級見工，畀機票、酒店、食宿你，由香港開始，再到亞洲，再到美國，見勻三大CEO之後，再安排你到總部見主席。整個過程搞足兩個幾月，令B哥覺得有點煩。
　　
終於見到主席，言談甚歡。臨拜拜，主席問：「Mr. B，你有冇嘢想講呢？」
　　
B哥答：「主席，老老實實，你哋已經玩咗我兩個幾月，呢次最後機會，咪再煩我嘞！」
　　
咁串，你估點？原來B哥一轉身，主席已交帶CEO：「This guy has super guts, sign him！」
　　
美國文化，「串」人反被欣賞！