【曾智華專欄】徒弟送師傅過終點

本欄馬迷讀者，應該記得去季中，小弟已提出一個理論——師傅送徒弟到終點，造就佢成為冠軍練馬師！
　　
講邊兩個？師傅正是蔡約翰，徒弟則是羅富全。兩人過去十年合作無間，感情非比尋常。
　　
我成日講笑，香港馬圈有個「蔡氏宗親會」，意指蔡約翰影響力所及，唔講得笑。神仙蔡到港之後，已經贏得十一次練馬師冠軍，真係食生菜咁食，原因練馬功力大超班外，犀利子彈源源不絕。馬主買馬可出天文價錢，而代神仙蔡尋找靚馬的代理人背景強勁，線路縱橫，加加埋埋，贏冠軍真的「依絲執」。
　　
去年小弟分析，佢應該係時候益下徒弟仔嘞，故此沿途負責「護送」，自己贏勒住勒住，絕不超前，但又要「扮」在競爭，好搞笑。結果睇住第三位的告東尼冇得爭後，立即「收韁」，八十四場W冚旗，而徒弟羅富全則風風光光以九十W「大勝」，師傅擺明送一程。
　　
好啦，今季嘞，蔡約翰年紀唔細，已經六十八，季尾變六十九，相信由馬會到馬迷都想佢留低，咁⋯⋯可能又要「搬龍門」！點搞？一於七十歲前再連𡁻兩屆冠軍練馬師啦！
　　
故此，今季又「去馬」！理所當然，羅富全不但不會阻頭阻勢，反之投桃報李，負責護送。至今神仙已贏三十四場，徒弟三十二場，最重要「阻住」呂健威、告東尼及沈集成，冇得逼近。未來日子，必定精采，因以上三位為乜要賣你帳？四月入直路就埋身肉搏！
　　
不過，我肯定蔡約翰無驚無險又冠軍，因仲有好多「秘密武器」未亮出也。
　　
明天戲碼麻麻，只有一場二班賽，出八隻，當中有一匹從未試過減分的馬「東方飛影」，配高手布文，好，就買佢！