【曾智華專欄】天生購X狂

今日標題個「X」，可以是書、鞋、袋、車、茶、酒、畫、鮑、翅、表……一匹布都寫唔完。
　　
我身邊的確有好多購「X」狂，例如有一位為報界名人、前老總鄭明仁，佢凡出街就孭住個布袋，最喜歡行新舊書局，樂此不疲，凡見新書舊書、新雜誌舊雜誌，總之睇啱即買。
　　
昨日見佢，陰陰嘴笑：「阿碌，我又買到寶啊！非常筍價，三十皮！」
　　
係乜？正是一本三十年前出版的時事雜誌創刊號。見到老鄭買書，就似女人買手袋、買鞋，一見喜歡的就會雙眼發亮，絕不會諗諗屋企已有幾十個手袋、上百對鞋，總之就是情難自禁，買買買，有用冇用、有錢冇錢都買咗先。
　　
事實老友圈皆知，鄭明仁的書，多數幾世都冇可能睇得完，但佢就似上咗買買買癮，買到屋企唔夠擺，就租地方擺。
　　
擺到上天花板時，就叫老友去攞，全部送。總之送完又買，買完又送，完全為滿足一剎那的「買買買」快感。
　　
另有一位也是天生奇人，正是「鋪王」B叔。老鄭買書就幾十蚊啫，但B叔則買鋪、買酒店、買樓、買工業大廈……分分鐘不是一間間買，而是一幢幢買。冇人完全知道佢買咗幾多，結果因一次食飯骾魚骨入肺，弄至肺炎失救，在毫無先兆下離世，此時才揭下一間，揭下又多一間……嘩，原來真係N+N咁多物業！
　　
點解佢揸咗咁多物業？正因早年好景時，B叔凡買必賺，地產代理、銀行、律師……見到佢，簡直見財神，多多優待。
　　
B叔乃天生購物（業）狂，凡見就買，好景時真係發到唔得掂。不過，2018年嘭的一聲社會運動，再來一鋪疫情，三隻蓋又點冚六個樽？接手的後代頭大如斗，終於決定狠心跳樓價出貨減債，富貴如浮雲。