【曾智華專欄】你冒險，我陪死？

每個人都有選擇自由，包括冒險玩命的自由。但你不應拉埋人落水，陪你搵命博！
　　
我講乜？正如政府再三呼籲，打風雷暴黑雨時，切勿走去滑浪或行山。因你一旦出事，消防、警察等公職人員唔救你唔得，但救就要N咁多人冒險，你實在太自私！
　　
有感而發，正因剛睇完一套真人真事改編的韓國猛片《24小時救參行動》，被綁的「參」，正正犯了上述毛病，真係累人累物！
　　
話說2007年時，阿富汗政府與「恐怖分子」塔利班開戰，手段兇殘，互相殺戮。當時由美國組成的聯軍，也有韓國兵參與，戰爭中擄去不少塔利班分子，鎖進監獄。
　　
理所當然，塔利班要營救自己的「戰士」，乜手段都使得出，包括四出綁架西方人質，要求對方作交換，否則一次又一次在直播中將人質斬首。這些片段，香港人多次在新聞中得見，當然南韓人同樣睇到。
　　
其實基於時勢凶險，各國政府早早警告國民，切勿到阿富汗，尤忌踏足滿布武裝組織的山區。唉……偏偏就有二十三名韓國盆唐泉水教信徒，不理政府警告，為咗「傳教」（？），偷偷前往阿富汗，就在山區被塔利班綁架，變成講數人質。
　　
佢哋自己冒險搵命博，但韓國政府唔救唔得。不過，美國及西方盟友須遵守大原則——絕不與恐怖分子協商！於是韓國唯有自己出手，派出外交談判專家（黃政民飾）及國家情報院特工（玄彬飾）拼死相救，過程非常緊張。
　　
此片動作場面極之可觀，尤其「萬人迷」玄彬一場電單車衝鋒陷陣追殺敵方過程，令人手心出汗。作為娛樂片，《24小時救參行動》收晒貨，但帶來反思，刻意玩命者，公職人員應否陪死相救？