【曾智華專欄】究竟佢在搞乜鬼？

近日與政治及傳媒老江湖春茗，你估最有興趣話題係乜呢？
　　
簡約公屋？錯！全面通關？錯！特首出訪中東？錯！錯錯錯之下，究竟係乜呢？
　　
正是今日標題——究竟佢搞乜鬼？呢個「佢」，正是葉劉淑儀。人人皆八卦、皆好奇，究竟佢點解突然抽起條筋「玩」馬會，要求政府加足球博彩稅，由五成變八成，想攞命咁款？
　　
連帶之下，人人又好奇，點解「新界強」劉業強身為香港馬會遴選會員，竟然手指拗出唔拗入，走去附和葉劉，明知馬會董事局及管理層就呢單嘢激到紮紮跳。個個當然聯想到「新界強」早前力爭做董事，結果被成擔檸檬浸瓜個案，喂，是否「大報復」呀？
　　
近日「財爺波」正密鑼緊鼓籌備《預算案》，突然有兩個行政會議成員打晒開口牌，要求增加馬會足球博彩稅，佢好難借咗聾耳陳對耳扮聽唔到噃。咁就算應酬吓，可能馬會亦將要納多億億聲稅，更甚此門一開，可能年年都畀人「玩」，變咗慣性就大件事。
　　
馬會為香港「權力象徵機構」，又有咁多前任及現任高官、行政會議成員做過/做緊董事及主席，對掌握官場文化、諗法⋯⋯當然比一般人深，肯定不會舉手投降。
　　
點呢？我估應該咁拆：第一，一人行一步，加多少足球博彩稅；第二，政府鬆章，開放馬會足球博彩場次（如今每年萬幾場，有潛質大幅提升到幾萬場，似英國情況）；第三，開放其他體育博彩，例如網球及籃球。三樣做齊就All Win，政府多咗稅收，馬會擴闊博彩範圍，收回所「損失」的，皆大歡喜。
　　
今晚又有得玩！
　　
主攻高班千二米賽事，我會三隻Q、PQ互穿：「緊張大師」、「駿馬風采」及「齊齊友福」，大家好運！