【曾智華專欄】支持「馬拉松聶」

朋友之間，一定要你支持我，我支持你，才會關係長存。支持乜呢？正是當你做好事時，要幫手，開到聲，一定要幫，例如搞慈善活動或個人籌款。
　　
前公務員事務局局長聶德權（哈，話佢係朋友，究竟有冇高攀呢？），去年六月卸任後，變咗「快樂聶」，大解放。首先周遊列國，就算疫情未過，照樣四圍飛，然後將風騷相片放上社交平台，羨慕死人。
　　
佢周身精力，雖然因為在過冷河，未可正式公布下一份高職，但你我都會估到，必有N咁多人搵佢出山。其中之一為去年十月底承諾做「香港新方向」榮譽顧問（相信只需齋噏，唔使落手）。
　　
好嘞，其他澎湃精力又點發泄？就係日日跑馬拉松，真係日又跑，夜又跑（社交平台見佢周不時夜跑）。
　　
跑跑吓，不但上晒癮，兼且今年正正式式參加渣打馬拉松，來一次「處男全馬」（嘩，夠唔夠力㗎，喂？），為作標誌，決定打正旗號為香港防癌會籌款，希望為癌症病人改善生活做出點點貢獻。
　　
如今任何人，只要老友夠多，真係「籌款容乜易」？因毋須四圍打電話或親身勸捐，只需在所有手機上的老友群組發個呼籲，誠心誠意話——盼望得到你的支持，共襄善舉，然後加幾個感謝Emoji即掂。
　　
如此，若你有人緣（當然，在位的當權者亦會大把人畀面，不過阿聶已卸任），肯定善款如雪片飛來。
　　
聶德權為官數十年，離開政府前，一直是民望最高的局長（唔使之一嘞），點解？因攞個心出嚟做嘢兼冇擺官威，尊重別人感受。
　　
小弟收到佢呼籲，二話不說上網捐款。咦，前面只有一千大元，可能我係第二個噃！且看「馬拉松聶」今次「處男全馬」籌到幾多先。