【曾智華專欄】許冠傑的集體回憶

近日不少老友見到我都笑口噬噬：「喂，碌Sir，你奔七喇噃！哈哈！」
　　
「奔七」即由六十九歲邁向七十歲，以前是一個「夢幻年紀」，如今與我日日一齊Happy者，全部六十五至八十歲，咦，又好似個個幾精壯噃。
　　
呢輪許冠傑準備再開演唱會，所以用大量時間操肌、減肥、練氣。犀利，可以一操即起，七十四歲人（《維基解密》指佢1948年9月6日出生），手瓜起晒𦟌，教練協助將狀態循序推進，以便4月7日再現紅館時，令人眼前一亮，與全場過萬老中青歌迷Sing Along！
　　
許冠傑對我輩香港仔，乃一個非常重要的「符號」，因標誌幾個香港重要的階段。
　　
第一次睇佢，為1966年。當時香港剛發生大暴動，之後百廢待興，政府急須令香港重新上路。為振奮人心，搞咗兩項非常成功的大型活動，一為《香港節》，另一為《卜公碼頭青年舞會》。
　　
當年唱中文歌被視為老套，加上「披頭四」熱潮席捲全球，推動年輕人蜂擁而起組樂隊，錢就搵唔到，但就迷倒大量少男少女。
　　
其時的Samuel Hui（冇人叫中文名咁「娘」）凡跳上舞台，例必出現轟天尖叫，短裙少女人人失控。如今諗返，再望望當年台下尖叫者，嘻嘻，個個做晒阿嫲阿婆喇！
　　
阿Sam上世紀七十年代頭愈跳愈勁，因高大靚仔加HKU畢業生，簡直電暈全港女歌迷。
　　
不過，奇，佢電人，但卻被一位美國女孩子俘虜了，正是傑嫂Rebecca Fleming。
　　
小弟最愛的許冠傑，停留在上世紀六十、七十年代，當時佢揮灑自如加狂野的舞台作風（最經典為在大球場赤裸上身、赤腳，用水淋頭於《Pop Folk 70's》中大唱大跳），絕對令人眼前一亮。如今五十年過去了，四月佢又能否帶我走入時光隧道呢？