【黃庭桄專欄】開心便好

每次跳出香港，欣賞不同國家的風貌，感受不一樣的風土人情，品嘗別國的地道菜餚，人總會特別興奮，即使明明有甚麼煩惱，都統統抖落在停機坪，不會隨行李起飛。
　　
你會不會像我一樣，人在異鄉，購買欲便會零舍高漲，使錢不會就住就住？
　　
每當行逛售賣手信紀念品的商店，雙眼就會發光，人也忘了形，不斷買買買。愈買得多，愈會感到不枉此遊。
　　
同伴通常會好言相勸：「不如睇定啲先至買？再行多幾間格下價吧！」
　　
已被花多眼亂的紀念品攝住魂魄的我，一於買咗先算，「萬一之後的鋪頭冇呢個款式，唔通行返轉頭咩？都唔順路，其實間間都差唔多價錢啦！」
　　
遠年的讀書時代，難得有機會出埠，最愛是印有當地名勝的T恤，上面往往寫有「I Love XXX（國家名）」的英文大字，提醒自己到此一遊，留低過不少腳毛。
　　
年少多懵，不會覺得老套，點都會買返1件，馬上就在餘下的旅程穿上，招搖地告訴當地居民：我是遊客喔！只要自己不覺得尷尬，尷尬的就是別人呢！
　　
買具紀念性的手信，不外乎鎖匙扣、磁石貼、水杯、擺設等。
　　
到紐約，梗係買迷你自由神像。去埃及，一定買金字塔。遊英國，大笨鐘擺設或英超球衣，是必然之選。還有俄羅斯娃娃、不丹唐卡、比利時朱古力、小樽音樂盒、法國波爾多紅酒、威尼斯玻璃精品、澳洲樹熊毛公仔……
　　
旅遊的意義，不妨偷得浮生豪1次，把行李篋滿載戰利品而歸，最多之後節衣縮食再儲錢，人一世物一世，樂在當下嘛！