【曾智華專欄】齊齊高呼：賈傑美

馬迷春茗，集中討論的騎師，不是潘頓、布文、麥道朗或莫雅，當然更不是形象低落的「拉叔」莫雷拉。
　　
咁講邊個？仲使講？當然係「萬人迷」賈傑美啦。呢位睇得騎得的墨爾本冠軍女騎師，已在極短的時間俘虜了香港馬迷的心（不分男女）。
　　
馬迷絕對公平，若你騎功差，靚到似天仙咁都冇人會捧你。賈小姐大受歡迎，絕對有根有據。
　　
永遠掛著正氣陽光感笑容，友善有禮。去年底首次亮相快活谷，其陣上的狠勁，作為女性騎師，有點難以想像。
　　
代表澳洲參加國際騎師邀請賽，雖未勝出（絕對與抽到的馬匹質素有關），但其走位的精靈、控制步速之到家及直路埋身肉搏時的鞭法，令人眼前一亮。
　　
更令人眼前再亮，為除下口罩時的美麗面孔！在芸芸麻甩佬騎師之中，簡直是萬綠叢中一點紅。上周再來香港，我等馬迷真幸福，親睹佢如何策騎大蝕分馬「遨遊氣泡」，以一流放馬功力，將全場男騎師及高分馬殺低。
　　
當日無論在看台或在賽馬節目中，人人高呼：「請佢到港！」就算未能長駐，間中客串又或在澳洲季尾時來騎三個月也好。有咗佢，必有三大化學作用：一、將香港賽事的可觀性提升；二、刺激所有騎師更努力，因餐餐輸畀女人，好惡睇也；三、有競爭就有進步，必令時龍時蟲的香港馬壇霸主潘頓打醒十二分精神；四、令香港賽馬事業更柔化多姿采，吸引更多人享受這項運動！
　　
明天又有一級賽「百周年紀念短途盃」，平磅，兩大高分馬「福逸」及「金鑽貴人」著數晒，但一Q返嚟反高潮。我會用兩隻分別買單式二重彩，拖三、四、五、六號。