【曾智華專欄】群組上的基本禮貌

踏入2023年，一切逐步復常，停咗近3年的大量群體活動，紛紛重新嚟過，包括各路人馬聚會（同學、舊同事、各方親友⋯⋯）。
　　
近來小弟要組織的，更有多年冇見，由美加英澳（洲）台等地「洶湧回港」的老友及親戚，2、3、4月肯定熱鬧非凡。
　　
難怪近日各食肆負責者都話：「碌Sir，真係好耐未見過咁訂位場面，簡直似V形反彈感覺，未來半年營業額全面解決！」
　　
有生意做，人人喜氣洋洋，見到都開心。
　　
任何群體活動，當然先要有組織者，然後召集參加者。組織者乃比較熱心，希望老友多多暢聚的「唔怕煩人物」，相對參加者則十之七八為唔想做嘢，只享受被動式參與。事實，不少群體關係若冇人肯做組織者，好快就會散檔。
　　
小弟乃天生組織者，唔怕煩，因非常享受與同聲同氣者聚首，暢談暢飲，又或一同旅遊，分享美景美食之樂。兼且人乃社交動物，若能與其他人建立互相扶持、關心、幫忙的聯繫，感覺實在非常之「正」。而這種「正」的感覺也推動很多飯局聚會出現，參與者人人大樂。
　　
不過，組織者也有煩惱一面。
　　
昨晚正與幾位熱衷做組織者的朋友共聚，呢類人的性格，通常主動、樂觀與唔怕煩。不過，位位都有共同苦水，正是在組織活動時，經常遇上冷漠或冇乜禮貌者。
　　
例如搞舊同事聚會，一般會在手機群組發放信息，請大家表態參加與否。正常而有禮貌者的反應有3種：一、欣然答應並致謝；二、抱歉未能參與；三、正在作時間安排，稍後答覆。
　　
還有就是不正常而冇禮貌的第4種——只讀不覆。這種人，多屬欠缺責任心及不懂尊重別人族類。