【曾智華專欄】講吓啫，唔得咩？

經常覺得葉劉淑儀有點似粵語片時代的李香琴，不是忠或奸的問題，而是間中拋幾句說話，會激到人紮紮跳，然後佢會漫不經意嘴藐藐窒你：「講吓啫，唔得咩？使乜咁大反應喎！」
　　
有睇新聞都知我講乜，正是葉劉在《財政預算案》公布前，突然拋出個嚇到馬會陣腳大亂的提議——將足球博彩稅由原本的50%上調至80%！
　　
點解馬會立即震晒？簡單，若葉劉為牛頭角順嫂或地踎茶記1名師奶，當然冇問題，噏乜都只是「1市民意見」，但以葉劉身分講就大件事！因佢係：一、行政會議召集人；二、立法會議員；三、政黨主席。
　　
以上4個身分加埋，尤其第1個，乃管治香港機器的極重要一員，佢講嘢，財政司司長敢唔敢當發噏風而懶睬？咦，好似唔得喎。
　　
咁就弊。就算陳茂波唔同意佢，但嗌到咁大聲要上調至80%，咁就算當開天殺價，落地還錢，就吓佢加一半或3分1，都是個天文數字，對馬會盤數影響極大。
　　
正因如此，馬會才會「反應咁大」，發動全身功力及機器，希望「消滅此提議於萌芽狀態」。
　　
《財政預算案》公布日期定於2月22日，仍有大半個月畀各方「做嘢」，一日未落實，一日仍會各自發功。
　　
尤其好看為馬會如何在未來3個星期，開展全天候公關大型攻勢，向全香港市民解釋，也向財政司司長游說，重手加博彩稅帶來的「災難性影響」，例如令非法賭博全面抬頭搶生意，令博彩稅因加得減，也令黑社會勢力坐大⋯⋯
　　
今晚賽事，蘇兆輝伏匿匿多時，應該開飯嘞——「友心友型」、「財才」、「安帥」、「太陽拍檔」及「機緣巧俠」，全部有機會，坐P搏W！