【曾智華專欄】必定不歡而散

世情之中，好多事根本唔使水晶球，都可準確預測到結果。哈哈，若果小弟貼馬有咁準就發大達。
　　
講緊乜？正是前晚與大群江湖好友團年，當然人人講八卦話題啦，當中之一，為非常好奇問：「碌Sir，你點睇港台同無記個『香港金曲擘面玩完』事件呀？」
　　
根據小弟N次經驗，呢類兩家或多家機構攜手做的頒獎典禮，多數一係出唔到閘，一係出閘脫腳，一係呢⋯⋯必定玩一次即散Band，無一例外，因這乃先天性的宿命！
　　
點解數十年來，幾個電子傳媒機構，以至印刷傳媒搞樂壇頒獎禮，都會「潮州音樂」式，「自己顧自己」搞呢？簡單：一、個個都想做大佬話晒事，咁又點能夠行埋一齊？二、個個機構文化及品味皆不同，捧歌手、樂隊取向不同，例如你喜歡達明一派，我喜歡Beyond；你谷王菲，我谷蔡琴；你認為盧冠廷夠特色，我就覺得鄭少秋、羅文最家喻戶曉⋯⋯真係大纜都扯唔埋。
　　
香港電台搞《十大中文金曲》，已有四十幾年歷史，當然有自己深厚文化、制度及看法。
　　
TVB呢，做咗霸主咁多年，雖然如今少少弱雞，但仍百分百以「一哥」心態出現，我想捧邊個就捧邊個！
　　
兩個大台起初諗住「雙劍合璧」，然後攜手獨步天下，唔係唔得，但要一條心囉，如今變咗一鑊泡！
　　
因為兩家大台音樂組決策人，一到埋枱傾，咁……理所當然矛盾浮現。無記在商言商，當然有好多這樣那樣的考慮，難道會心甘情願益其他競爭對手？
　　
香港電台又如何，雖冇錢銀需要考慮，但總有自己的立場及傾向。
　　
結果可能是你的「公平」變成我的「毒藥」，最終當然散檔！