【曾智華專欄】你的地獄我的天堂

童年讀書時，已經常接觸比對性句子，例如：你的蜜糖，我的毒藥；你的噪音，我的音樂；你的美酒，我的砒霜⋯⋯

當然，行過不少人生路後，小弟也有真實體驗，是——你的地獄，我的天堂！

上周本報馬經權威張福元老哥在專欄呻——地獄賽期備課倉卒。講乜？正是已到年尾，今晚跑完，周六又跑（年三十），然後下周二再跑（年初三）。七日跑三次馬，當中夾著四日假期，行內皆知，印刷業及報業工作者，凡年尾多會休息，除新聞外，所有版面都要趕趕趕，趕在新年前交足稿，於是人人趕到裙拉褲甩（當然包括專欄版！）。

喂，馬經版又如何？七日跑三次，員工當然呻到樹葉都落！故此，張福元老哥稱之為「地獄賽程」。為要遷就各方持份者，馬會年廿九為年初三的十一場賽事排位。如此，就算你叻到會飛，都冇可能刨晒所有出賽馬，因實在太吃力，也不可能提供有水平的分析。站在評馬業及報業講，當然絕不理想！

不過咁，站在馬迷立場又完全唔同睇法噃。眾所周知，馬迷大部分為男性，兼且以上年紀者居多，大佬呀，由年三十到年初四，共有五日假期，真係悶到想死㗎！

如今疫情未全散，上門拜年可免則免，搓麻將也大大減少。老友晚飯又唔係幾妥，因過年始終與親人同過最好。

咁屈喺屋企五日，好易家嘈屋閉噃。呢呢，若有兩日跑馬就掂晒。一支公躲埋刨呀刨，到跑時直播又嗌呀嗌，簡直是新年假期的「天堂消遣」。張福元老兄，張就吓啦，唔該！

今晚又有得玩！最好睇三班跑一千米！

「華麗活力」乃潘頓私家馬，必去！腳拖「加州得力」及「靚蝦女」。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。