【曾智華專欄】港鐵快開電子票班

早上的茶記，是最佳蒐集草根民意地方。個個阿哥阿姐阿叔阿嬸阿公阿婆都擘大喉嚨，唔啱就噴，毫不避忌，當中有的非常偏激自私或情緒化，但也有合情合理的。
　　
上周五早上七點半踏入茶記，人聲嘈雜，好似扯晒火咁，原來講緊高鐵通車，似乎班長者好多不滿。萍姐素來率直，有嗰句噴嗰句，好㷫：「逼人上網是今時今日毫無同理心嘅政策，必須一律遵守，已成惡例。我哋班老嘢，唔識上網咩，咁就去上吊啦（嘩！使唔使感激啊？）。究竟港鐵有冇少少良心㗎，我點識上網呀？」
　　
肥叔：「萍姐，幾十歲人咪咁勞氣，你有血壓高㗎！不過，真係弊，香港有超過二百萬長者，究竟港鐵有冇做過調查，有幾多個唔識上網，又或Download Apps㗎？單單我識班老坑，真係十個冇三個識！用智能手機都係靠孫仔逐樣教。人老學嘢慢，點搞？」
　　
崔伯乃知識分子，比較理性：「各位，上網、用手機、電子化係一去不返大潮流，大家願唔願都要接受！不過，受還受，揸權嗰班都要知道民情㗎，點解唔用多啲時間、多啲人手、多啲耐性，先教曉長者點買電子票才實施呢？仲有，你點可以奉旨認為佢哋識個乜乜12306網站㗎？不少連網上填嘢都唔識，真係求救無門！」
　　
究竟呢類草根長者的民意，有冇機會去到港鐵管理層耳中呢？港鐵阿頭個個精英，處理大小事務都用手機，必定認為一切是「手板眼見工夫」Easy Job，「正常人冇理由唔識嘅」！
　　
聽聽下，老友高佬強傳來漫畫，為大隊無助長者，揸住個手機去廟街好似求籤咁等「睇相佬」專家逐一教點買電子票。
　　
睇完，真係唔知好嬲定好笑！